طريقه إنشاء حساب في PayPal في مصر

السلام عليكم ورحمه الله وبركاته ♥

هانتكلم النهارده عن حاجه كتير بيسأل عنها وهي التعامل مع الباي بال في مصر نظراً لإن الموضوع دا مُعقد نسبياً هنا 

هاشرح بالتفصيل كل حاجه من اول ازاي تعمل حساب علي الباي بال وتربطه بـ فيزا عشان يتفعل وتبدأ تستقبل عليه اموال 

1- اول حاجه هاتروح لموقع الـ PayPal من هنا  

وبعدين تضغط علي تسجيل الاشتراك زي ما هو موضح بالصوره 

2- هايفتح معاك صفحه تانيه تختار منها Personal Account 

وبعدين تعمل Continue

3- هايفتح معاك صفحه تانيه تكتب فيها بياناتك ويُفضل تكون بياناتك الحقيقيه لان الـ PayPal لو اكتشف ان حسابك مُزيف هايقفله بغض النظر بقي فيه فلوس ولا لأ فـ ياريت تكون البيانات صحيحه تجنباً للمشاكل ولازم تعمل كلمه مرور صعبه عشان الباي بال يقبلها يعني لازم مثلاً تعمل حرف كابيتال A , D وتحط ارقام ورمز زي مثلا الـ @ 

4- بعدين هاتروح لصفحه تانيه فيها بيانات اضافيه لازم تكملها بردو وتكون صح ولازم العنوان ورقم الموبايل والرمز البريدي يكون صح زي ما اتفقنا قبل كدا تجنباً لأي مشاكل

بعد ما تكمل البيانات كلها اضغط علي موافقه وإنشاء حساب , هايبعتلك علي الايميل بتاعك الي عملت بيه الحساب رساله تفعيل , لازم تفتحها وتضغط علي الرابط الي فيها عشان يتم تفعيل حسابك علي الباي بال 

وممكن يطلب منك بعدها تسجل الدخول علي الباي بال بالبيانات الي انت عملتها عشان تتم عمليه تفعيل الحساب 

وبس كدا بقي عندك حساب علي الـ PayPal ومتأكد ببريد الكتروني , ويُفضل يكون ايميل علي الياهو او الجيميل نظراً لانهم من أأمن المواقع الي موجوده دلوقتي 

بس لسا متقدرش ترسل او تستلم اموال علي حسابك علي الباي بال لان زي ما قولنا الموضوع مُعقد شويه فـ لازم يكون عندك فيزا تربطها بحسابك عشان تتمكن من ارسال واستقبال الاموال

ودا الي هانتكلم عنه قريباً هانشرح ايه افضل فيزا موجوده بتتعامل مع الباي بال واقدر من خلالها استقبل او ارسل اموال وكمان اسحب وبتكلفه بسيطه  

تابعونا ! ♥